|
|
陳冠希噚日被《蘋果》爆有新女，同大陸超模秦舒培喺香港當街錫錫，戀情曝光，不過夜晚超模有米老公兼華誼高層趙磊喺微信朋友圈發公開信，聲稱同秦舒培未離婚，更指女方光明正大出軌。
據知秦舒培曾向友人稱自己已「離婚」，相信陳冠希只係「誤食」人妻，而睇番趙磊同秦舒培呢兩公婆嘅微博，趙磊微載對上一次放佢同秦舒培合照已經係2015年1月嘅事，而兩公婆對上一次po合照就係2013年。
之不過，秦舒培一直冇喺微博貼相，見佢嚟嚟去去都係擺一啲同朋友去玩嘅相，未知係想婚事低調，定疑係隱藏人妻身份呢!?
陳冠希(Edison)被爆同大陸超模秦舒培拍拖，外間都以為女方已經同華誼兄弟時尚文化傳媒董事總經理趙磊離婚，兩人光明正大交往，仲被拍到一齊返上環蘇杭街The Jervois精品酒店(新聞連結：http://bit.ly/1Pe1ZgW )，戀情斷正。點知，原來係婚未離。
噚晚秦舒培老公趙磊喺微信朋友圈發公開信，稱自己同秦舒培未離婚，即係希哥現任女友仲係人妻，更形容自己就好似一個笑話：「當出軌門新聞震驚著我，也震驚大家時，我在憤怒、悲傷之時，選擇聽長輩的勸導：要學會原諒學會放手學會尊重自己，做好自己就行。」「更想問一聲甚麼時候出軌，變成一個光明正大？P.S 離的事還沒辦就需要我的祝福嗎？」
今日下午二時半左右，陳冠希同女友秦舒培又現身The Jervois精品酒店，準備離開，父親陳澤民早一步出嚟。陳冠希一臉鬍鬚，女友就戴帽，垂頭急急上車。記者問秦舒培是否未離婚？秦未有回應，而陳冠希即上前，用腋下想夾住記者部相機同DV機，頗為激動。記者再問陳冠希是否同秦舒培拍拖？陳即高呼:「我有好多女朋友0架喎!你去我IG睇下啦!」
|
|
發表於 2016-5-31 20:23:35
