|
|
我自己本人都有玩手機遊戲, 但唔會重課金, 因為與其用幾千蚊玩低成本製作, 不如買部PS4玩高畫質遊戲
作者: 雞蛋兄弟
Peter 推介我玩一隻手機遊戲，
話近期評價好高，好多人玩，依家開始仲送英雄乜乜乜，星來星去，好似好豐富。
「係咪Google Play 頭十免費遊戲？ 」我打斷左佢既興奮。
佢望一望個螢幕，又真係排緊第五位，反問番我「咦，係喎，蛋弟你玩過？」
低B發問加上Peter 呢個天真嘅樣，耐性差啲都忍唔住一巴摑落去，
「呢啲垃圾，狗都唔屌」。
時間回溯番去三年前，就係 《Puzzle & Dragon》 呢款手機遊戲開始紅，賺左唔知幾多個億之後，一班遊戲發展商就發現左呢條新Profit Formula。由於收費遊戲會嚇走班窮鬼，所以只要打著「免費」呢個旗號，就肯定會有班以為唔俾錢就有得享受嘅傻仔上釣。呢種遊戲唔著重畫質人物劇情，務求短期賺夠就摺埋另起爐灶，而最直接的賺錢方法就係左抄右抄，開頭俾些少甜頭你，後面就愈玩愈難，再慢慢推出威力無窮的法寶英雄引誘你課金。
時至今日，所謂的「熱門手遊」己經發展到相當成熟，廠商唔理好醜交一筆推廣費就可以登榜。宣傳噱頭吹得就吹，毫無忌諱，而入面的吸金法門好有可能比隻遊戲主線更加豐富。單講命名，一隻手遊個名係可以參考自任何知名遊戲動漫故事，《魔獸世界》、《魔力寶貝》、《仙劍奇俠傳》、《火影忍者》、《海賊王》等等，在關鍵字前後再加上數個名詞組合，就可以係一款新遊戲。以《海賊王》為例：遊戲名可以係：海賊幻想，海賊戰紀，爭霸海賊，海賊傳說，海賊天下，天下海賊 等等，總有一個係左近。而個LOGO多數係一幅手繪主角圖，似七成但又唔會抄足，疑真疑假。有些廠商為求創意會走遠一步，以故事背景命名：草帽傳說，木葉幻想，軒轅傳奇OL等等，成功叼光。
而講到呢堆遊戲主力開創的賺錢手法，真係多如繁星，先講幾個常見主菜：
一，能量 Energy。由Facebook 遊戲開始植入的系統，玩家通過每個關卡都需要用能量。美其名唔想你上癮，實則日日釣你癮。由於唔可以長玩，一個簡單關卡可以拖至幾日，而玩家就要每隔數十分鐘回頭檢查一次，頂唔順就要俾錢。遊戲入面提供直接買Energy Bar, 加大 Energy Capacity又或者係加快Energy Refill Rate 等等，愈方便愈貴，買一次可能係N枝寶礦力嘅價錢。而最賤係能量需求會隨關卡提高，重新挑戰又需要更多能量，永無止境。
二，轉蛋 Gatcha。電子轉蛋係Online Game 時代己經盛行。消費者永遠唔知機率，獎品多數係一隻期間限定的裝備怪物卡片人物whatever。你想買唔可以直接買，只能用抽，過左限期就無份。偏偏抽蛋就係利用人的搏彩心理，900蚊你唔忍心，但係9蚊一次 ，每次1%中獎，玩家就覺得可以試下。每次獎品都會強過之前，每次都限定，長抽長有，樂此不倦。而曾經有種抽蛋叫Complete Gatcha（套式集換轉蛋），呢種吸金方法甚至被日方例為違法，想知多啲可以參考下。
三. 每日登入/簽到 Daily-Login. 顧名思義，每日登入都有獎，但係唔可以斷開。通常第三十日果份會係特別大獎，其餘廿九日都係垃圾。所以你每一日都要按入去簽到，勤力過番工番學。你滿心歡喜以為遊戲商好大方送禮物，其實只係希望你玩耐啲，每日都睇下有咩新轉蛋，或者用下能量挑戰關卡。咁如果漏簽一日咁點？唔緊要，只要買幾粒鑽石就可以補番。
由休閒遊戲至角色扮演類，以上主菜屢見不鮮，而為左進一步吸引消費，以下五種伴碟更為和味：
四，碎片 Fragments。 碎片可以話係抽蛋嘅好伙伴，先假設你想用五十蚊抽一隻”神獸A”，廠商知道抽中機率低會令玩家心灰，所以為滿足玩家希望抽到嘅慾望，轉蛋入面會大機率出現”神獸A” ！── 的碎片。今次抽唔中唔緊要，只要抽中三十個碎片就可以合成一隻。由於隻遊戲可能會有七十隻神獸，你好大可能會有五十種碎片，但係無一隻實物。原理就好似呀婆賣橙，不過分開一件件賣。
五，強化 Enhancement。你以為好彩抽到就唔駛俾錢 ? Nonono，你果隻未到最勁，要用材料去加強先得。材料又同每日登入同抽蛋掛鈎，可能某日送少少，或者抽蛋會抽到，或者星期二先打到，總之好常見，但係要好多。將神獸A成為神獸A+1可能要30件，變A+2可能要60件，最勁去到+30，所以永遠都需要但係永遠都唔夠。當然強化有得有唔得，失敗都好正常，課金材料包、防失敗卡隨時等候，再接再厲。
六，合成/升星/覺醒 Evolve。你以為有幾隻A+10就最勁 ? Nonono，你咁樣唔夠勁，你兩隻A+10，係可以變做 AA級。你知啦，啲關卡大佬咁多血，得隻A+10 邊會夠打姐，對上仲可以變S, SR, SSR, UR, L 等等，只有下限永無上限。
七，天賦 Attribute。 你以為有一隊AA+10 就最勁 ？ Nonono，你果幾隻啲天賦唔得。咩係天賦？就係一組隨機的數字／技能／屬性。以兩件裝備B為例，明明同名，但係唔同數值，玩家就要用錢要幫佢「洗點」，洗到佢有你想要果種效果，當然都係隨機。
八，競技/排名/皇者榜 Ranking。 第一名就送SS，第二名就送S如此類推，每一個時間以積分定期結算。總之人比人比死人，美其名送禮，但係一定要俾錢先分得出高下，然後衍生重置比賽對手，重置戰績，雙倍積分等等付費道具。
三大主菜加埋五大伴碟，一層扣一層咁建構左一隻遊戲主系統。即使你隻遊戲只係掛個名，求其畫番兩三張角色圖己經可以吸一堆金，但係唔好唔記得仲有甜品放送：
九，復刻Remake。同限定可以話係成雙成對，雖然三個月前講明限定，但係復刻就代表撈番以前的角色再出多次。套邏輯係：復刻完就無架啦，限定架嘛！
十，自動 Auto。由於材料需求極大，好多時需要玩家重複以往關卡。廠商都知咁樣玩好悶，所以直頭有埋個自動制。你開住隻遊戲按自動制就得架啦，電腦會幫你打材料。呢種高智能服務當然要俾錢，次數又好，天數又好，唔買就屈你用半個鐘打多次呢關。而比自動更昂貴嘅叫掃蕩，一鍵立即通關，玩埋你果份。
十一，活力Vitality。能量都唔夠賺，活力係另一種，指你每日用左幾多能量。用左三十能量代表你有三十活力，只要每日用夠一百能量，你就有一百活力值可以兌換道具，不過你最盡都係用到九十，因為最後十點活力一定要課金先拎到。
十二，分享 Share。分為對內同對外，對內者任何三唔識七玩家抽中好野都會全遊戲廣播，唔關你事都要等你葡萄刺激消費；對外者就係有五個朋友玩就送十粒，有五十個朋友玩就送六十粒。評價五星就有七點能量值，輸入邀請碼就送四星英雄，朋友買點你有回贈等等，情況就好似Peter 仔咁戇居。
當十二招出齊，再加少少混合，你就會發現以下對白似曾相識：
「我刷緊第二十次首抽」
「等等先，打緊材料清能量」
「唉，差兩次先上到銀級」
「呢關三隻S，得兩隻AA 唔夠勁」
「玩唔玩? 依家玩做我朋友送五星抽獎卷呀」
每隻免費手機遊戲都離不開呢幾個吸金系統，
而玩呢啲低質遊戲嘅人就每日重複同樣輪迴直至科水，
一邊話忙又一邊手不離機，
一邊叫大家陪佢玩，又一邊課金要勁過你，
洗洗埋埋幾千蚊個角色都仲係唔咸唔淡，
隻GAME玩你多過你玩隻GAME，打機慘過番工，你睇下你，做咩姐？ |
|
發表於 2016-1-13 15:41:19
發表於 2016-4-10 11:44:49
樓主