致初職 - 職場六大潛規則

choicecare

職場有太多潛規則，一個唔覺意，就可能會影響你喺同事/老細心中嘅印象，又或者得罪一啲唔應該得罪嘅人，隨時跌入萬劫不復之地。一齊睇睇有咩要留意~

1.小心是非精
初到貴境，首先要做嘅係認清你每位同事嘅個性。特別要小心大喇叭是非精，如果返到公司見到有人走嚟同你搬弄是非，敷衍下佢哋就好，等你培養好實力，就唔駛再唔怕佢哋。

2.唔好隨便發脾氣
喺職場呢個成年人嘅世界，唔會個個上司都好似媽媽咁照顧你。你要明白發脾氣都唔會解決到問題，只會令人覺得你唔夠成熟。脾氣喺職場裡面起到嘅作用好有限，而且對身體唔好，留返啖氣暖下肚啦。

3.睇氣氛做人
每個辦公室嘅氣氛都唔同，有啲辦公室比較寧靜，破壞咗大家習慣嘅氣氛難免會令人覺得你阻住大家做嘢。如果你發現新公司嘅人都比較輕鬆，但都唔可以太過掉以輕心。可能大家做起嘢上嚟係好集中，千萬不要破壞氣氛。

4. OT隨時畀人排斥
啱啱出嚟做嘢有好多嘢要學要pick up，人地放曬工都繼續OT。雖然個人努力係好重要，不過如果公司冇OT文化，就算你好勤力，都要留意其他人嘅放工時間，以免好心做壞事。

5.白紙黑字好重要
如果你係個老實人，諗住嚟到職場大家都係同你一樣，你就要好好諗方法保護自己。如果去到啲孭鑊位，唔知係善忘定其他原因，有啲人真係會話冇講過。所以有時同人地傾完嘢，最好就畀返個email佢confirm返，等大家有個紀錄，唔使口同鼻拗。

6.唔好咁Jumpy
辭職好容易，遞封信就得，不過唔好睇小對你職涯嘅影響。如果你份份工都做得唔長，呢個record喺CV上面係不可逆轉。嘗試盡咗力之後先好選擇離開。因為HR見你份份工都做幾個月，將來好工都未必會請你。

做到野雖然好緊要，但都唔可以睇少人際關系既影響力~ 話唔定隨時救你一命ga。

資料來源： Jump - 6個FreshGrad要知嘅職場潛規則

-----------------------------------------------
再思社區健康組織
性病/愛滋病諮詢、情緒支援、愛滋病病毒及性病快速測試
預約電話：3188 9024